ميزات واسرار التليجرام

مش هنطول في موضوع التليجرام ولا في موضوع التعريف بيه فالبرنامج غني عن التعريف بس هنذكر بعض الميزات اللي عدت علينا وان شاء الله تستفيدوه منها 

في شوية مميزات هتكون اكيد عارف بعضها واكيد في حاجات تانية معدية عليك منها
نخش بقى على الميزات اللي معانا ولازم نكون الاول عارفين اننا بنكلم الكل من اول واحد لسه هيبدأ يستخدم لواحد زينا كدا عادي عارف حاجات ومش عارف حاجات طبعا الناس اللي متمكنة شوية اكيد مش هتحتاج الموضوع اوي بس لعل وعسى

أول ميزة هي تعديل الرسالة عندك في أي وقت 

تاني ميزة انك ممكن تمسح الرسالة إللي بعتها بالغلط أو ما كنتش عايز تبعتها او رجعت في قراراك وتمسحها في اي وقت بل وممكن تمسح الرسايل اللي مراسلك باعتها لك من عنده ودي ميزة للبعض وعيب عند البعض 

كل إللي عليك تضغط جامد على الرسالة وتمسحها او تعدلها

الميزه إللي شايفها برده كويسة هو أنك ممكن تبعت الرسالة بوقت معين يعني مثلاً تجدول كذا رسالة وتبعتهم في أوقات أنت بتختارها 

كل اللي عليك تكتب الرسالة وتضغط جامد على زر الارسال 

وهتلاقي علامة الجدولة ومن نفس الضغطة دي هتلاقي كمان ميزة أنك تبعت الرسالة صامتة ما تعملش إشعار للمرسل اليه

ميزة أنك تعمل محادثات سرية ودي  بتمنع الاسكرين شوت

ميزة أنك تقدر تمسح حسابك بعد فترة من الغياب شهر تلاتة ستة سنة ...

ميزة أنك تقدر تحمل ملفات لحد جيجا ونص  للملف الواحد ولا تقولي احسن موقع رفع ملفات

ميزة أنك تعمل شغلك ونظامك عليه 

يعني تعمل قناة للأرقام والايميلات بتعتك .. تعمل قناة للملفات المهمة ... وغيره وغيره

ميزة انك بتوصل لحاجات مدفوعة كتير جدآ بشكل مجاني وتقدر تبحث بنفسك عن كتب كورسات وأكبر دليل هي المعادلة الأمريكية إللي متوفرة كاملة على التليجرام

ميزة أنك تقدر تفتح نفس الحساب في كذا تليفون في نفس الوقت مش زي الواتس

ميزة أنك تخفي رقمك واسمك عن اي حد غريب ودي مفيده جدا في حالات الجروبات والاشتراك في القنوات المختلفة بالنسبة للي ما بتحبش الاختلاط او الظهور باسمها في جروبات

ميزة أنك ممكن تقسمه المجلدات يعني تعمل القنوات بتاعة الدفعة مثلاً في مجلد .. القنوات الخاصة بيك في مجلد .. المجلدات الخاصة بحاجة معينة في مجلد وهكذا

ميزة أنك تسجل فديو بشكل دائري من زر الصوت ضغطه واحدة بتخليك تغير من صوت لفديو والعكس

ميزة عمل اختبارات  واستطلاعات راي عن طريق بوت مخصص بيخليك تعمله وتشاركه مع اي حد 

ميزة البوتات في بوتات رهيبة وجميلة جدا بمختلف الأعمال ياريت تكتشفوها

ومن ضمنها بوت للقران بوت بوت لتغير الصوت وتغير المفات إسلاميات وبوت طبي لجميع السنين وغيرهم وغيرهم 

و في حاجاااات تانية أنا مش عارف أستخدمها ولا عارف اوصل لها

على اد ما تقدر اكتشف الحاجات دي بنفسك لان معظمها واضح ان شاء الله يعني عايزك تقلب الاعدادات حته حته وتكتشف اللي فيها وتقلب البرنامج وتطلع بالمزايا اللي تقدر عليها وخلي نيتك لله ان دا علم برده تأجر عليه ان شاء الله

رابط تحميل التليجرام من جوجل بلاي